பெருந்திணை

முகத்திற்கேற்ற விழிகளாக
உன் காதலன் நோக்காக்கால்
நிலைகொள்ளாது ததும்பி
எனை நோக்கும்
அவ்விழிகளை வரைவேன்
பின்பு அவ்வோவியத்தை
சுக்குநூறாக கிழித்தெறிவேன் 

கேவல்

தழுவிச்  செல்லும் 
காற்றின் புரடியை பற்றி இழுத்து
அதன் மென்னியை
மெல்லத் திருகுங்கள்
செவிப்பறையில் செல்லும்
அதிர்வலைகளில் மட்டும்
கிளர்ச்சி
கோபம்
ஸ்கலிதம் மற்றும் இன்ன பிறவற்றை
நீங்கள் மரணிக்கும் வரை
கேட்டுக்கொண்டிருக்கலாம்
ஒருக்காலும் பிடியை
தளர்க்கசொல்லாது.

பிரபஞ்ச தரிசனம்

கடந்து சென்ற
அந்த ஓரிரு நொடிகளை
ஒன்று புள்ளி நான்கு நான்காம்(1.44) முறையாக
நினைவு கூர்கையில்
எடை தாளாமல்
மஞ்சள் நிறக்கலவையாய்
வெடித்துச் சிதறினேன்

அதில் ஓர் சிட்டிகை எடுத்து
கண்ணக் கதுப்புகளில் பூசி
கோயிலுக்கு செல்கிறாள்
அடேய் மண்டையா
உன் பிரபஞ்ச தரிசன
பிதற்றல்களை கக்கத்தினுள்
ஒளித்து வைத்துக்கொள்

காதல் கலவி மரணம்

இன்னும் சில மணிநேரத்தில்
தினங்களில் அல்லது வாரங்களில்
எண்ணிலடங்கா மீளுருவம்
பெறா கூறுகளாய் மாறும்
அக்கணத்தை பலவாறு
மீட்டுருவாக்கம் செய்தேன்
அக்கணம் இம்மீட்டுருவாக்கங்கள்
அல்லாத வழியில் தானென்று
எனக்கு சர்வநிச்சயமாகத் தெரியும்.